ဝၼ်းဝိသႃႇၶ လိူၼ်ႁူၵ်းမူၼ်း

ဝၼ်းဝိသႃႇၶ ပွင်ႇဝႃႈ လိူၼ်ႁူၵ်းမူၼ်း။ ဝၼ်းလိူၼ်ႁူၵ်းမူၼ်းၼႆႉၼၼ်ႉၵူၺ်း မၼ်းလမ်ႇလွင်ႈဢၼ်ၵပ်းၵၢႆႇလူၺ်ႈလွင်ႈြၽႃးပဵၼ်ၸဝ်း မီးယူႇ 3 ပိူင်ၸွမ်းၵၼ်

1. မႅၼ်ႈမိူဝ်ႈဝၼ်းြၽႃးပဵၼ်ၸဝ်ႈၵိူတ်ႇ

2. မႅၼ်ႈမိူဝ်ႈဝၼ်းြၽႃးပဵၼ်ၸဝ်ႈႁုႁၼ်ြတႃး

3. မႅၼ်ႈမိူဝ်ႈဝၼ်းြၽႃးပဵၼ်ၸဝ်ႈၶဝ်ႈၼိပ်ႉပၢၼ်ႇ

ဝၼ်းဝိသႃႇၶ လိူၼ်ႁူၵ်းမူၼ်း ဝၼ်းၸၢဝ်းပုတ်ႉ ၵူႈမိူင်းမိူင်း ႁွမ်းမိုဝ်းၵၼ်

ၵူႈသႃႇသၼႃႇ မီးဝႆႉဢၼ်ၶိုၵ်ႉတွၼ်းထိသုတ်ႊ ႁင်းၽႂ်ႁင်းမၼ်း။ မိူၼ်ၼင်ႇဝၼ်းၵိူတ်ႇၸဝ်ႈယေႇသု (Jesus ၵီျးသၢသ်ႉသ်) ၼႆႉပဵၼ်ဝၼ်းၶိုၵ်ႉတွၼ်းထိသုတ်ႊ ၼႂ်းသႃႇသၼႃႇရဵတ်ႉ။ ၶဝ်ဢွၼ်ၵၼ်ဝႃႈ “ဝၼ်းၶရဵတ်ႉမၢတ်ႉ” ၼႆသေ သမ်ႉတူၵ်းမႅၼ်ႈလိူၼ်တီႇသႅမ်ႇပိူဝ်ႇ ဝၼ်းထိ 25 ၵူႈပီ။

      ၼႂ်းသႃႇသၼႃႇႁိၼ်ႇတူႇၶဝ်ၵေႃႈ “ဝၼ်းတီႇပႃႇဝလီႇ” ဢၼ်မႅၼ်ႈမွၵ်ႈလိူၼ်ၼူဝ်ႇဝႅမ်ႇပိူဝ်ႇၼၼ်ႉ ပဵၼ်ဝၼ်းယႂ်ႇထိသုတ်းယဝ်ႉ။ ၼႂ်းသႃႇသၼႃႇမူႇသလိမ်ႇသမ်ႉ “ဝၼ်းၵိူတ်ႇမူဝ်ႇႁႃႇမႅတ်ႉ” ၼၼ်ႉပဵၼ်ဝၼ်းဢၼ်ႇယိုင်ႈယႂ်ႇထိသုတ်းတႃႇၶဝ်ၼင်ႇၵဝ်ႇယဝ်ႉ။ ၼႂ်းသႃႇသၼႃႇၵိျဝ်း (Judaism) ၶဝ် ၸိုင်ဝၼ်းပီမႂ်ႇဢၼ်ၸိုဝ်ႈဝႃႈ “ဝၼ်းယင်ႇၶီႉပူး” ၼၼ်ႉ ပဵၼ်ဝၼ်းတၢင်းသဵင်ႈၽွမ်ႉသဵင်ပဵင်းပၢၵ်ႇၵၼ်ၼၼ်ႉယဝ်ႉ။

      ပုၼ်ႈတႃႇၵိူဝ်းယမ်ၼပ်ႉထိုဝ် သႃႇသၼႃႇပုတ်ႉထလူူူး ဝၼ်းလႂ်သမ်ႉပဵၼ်ဝၼ်းဢၼ်ယိုင်ႈယႂ်ႇလိူဝ်ပိူၼ်ႈမူတ်းလႃႇ? ပဵၼ် “ဝၼ်းဝိသႃႇၶ လိူၼ်ႁူၵ်းမူၼ်း” ယဝ်ႉ။

ဝၼ်းဝိသႃႇၶ လိူၼ်ႁူၵ်းမူၼ်း

      ၶေႃႈဢၼ်ဝႃႈဝိသႃႇၶၼႆႉ ပဵၼ်ၽႃႇသႃႇပႃႇလိ ပွင်ႇဝႃႈ လိူၼ် ႁူၵ်း ၼႆယဝ်ႉ။ ၼႂ်းၽႃႇသႃႇသၼ်းသၵရဵတ်ႉ (သၵ်ႉၵတ) တႄႉ ၶဝ်ႁွင်ႉဝႃႈ ဝေႇသႃႇၶ ၼႆသေ ဢင်းၵိတ်းၶဝ်သမ်ႉ မႃးႁွင်ႉဢဝ်ဝႃႈ ဝေႇသၢၵ်ႉ ၼႆယဝ်ႉ။ ဝၼ်းဝိသႃႇၶ လိူၼ်ႁူၵ်းမူၼ်းၼႆႉ ယွၼ်ႉသင် မၼ်းပဵၼ်ဝၼ်းဢၼ်ယိုင်ႈယႂ်ႇ တႃႇၸၢဝ်းပုတ်ႉႁဝ်းၼႆလႃႇ? ဝၼ်းဝိသႃႇၶ လိူၼ်ႁူၵ်းမူၼ်းၼႆႉ ပဵၼ်ဝၼ်းဢၼ်ၸဝ်ႈၸၢႆး ၸဝ်ႈသီႇထၢတ်ႈၵိူတ်ႇႁၼ်ၼႃႈ တီႈၼႂ်းသူၼ်မွၵ်ႇလုမ်ႇၽိၼီႇ ၼၼ်ယဝ်ႉ။ လိူဝ်သေၼၼ်ႉ ဝၼ်းဝိသႃႇၶ လိူၼ်ႁူၵ်းမူၼ်းၼႆႉယင်းပဵၼ်ဝၼ်း ဢၼ်ၸဝ်ႈၵေႃးတမ ႁုပွင်ႇသၸ်ႉၸႃႇသီႇယိူင်ႈသေ ပဵၼ်ြၽႃးတီႈတူၼ်ႈမႆႉၺွင်ႇ ပုတ်ႉထၵယႃႇၼၼ်ႉယဝ်ႉ။ မိူဝ်ႈဝၼ်းဝိသႃႇၶ လိူၼ်ႁူၵ်းမူၼ်းၼႆႉၼင်ႇၵဝ်ႇ ပဵၼ်ဝၼ်းဢၼ်ြၽႃးပဵၼ်ၸဝ်ႈ ဢဝ်ၶၼ်ႇထပရိၼိပ်ႉပၢၼ်ႇၵႂႃႇယဝ်ႉ။ ၵွပ်ႈပိူဝ်ႈၼႆလႄႈ ဝၼ်းဢၼ်ႁဝ်းႁႃးလီတွင်းၵိုမ်းဝႆႉ ပဵၼ်ဝၼ်းတီႈယိုင်ႈယႂ်ႇၼႂ်းသႃႇသၼႃႇၼႆယဝ်ႉ။

      ပေႃးထိုင်ဝၼ်းဝိသႃႇၶ လိူၼ်ႁူၵ်းမူၼ်းမႃးၸိုင် ၼႂ်းလူၵ်ႈၼႆႉ ၵူႈမိူင်းမိူင်း ၸဵမ်မိူင်းၵိူဝ်းယမ်ၸၢဝ်းပုတ်ႉ၊ ၵိူင်းမႁႃႇယၼလႄႈထေႇရဝႃႇတ ဢွၼ်ၵၼ်ႁၢင်ႈႁႅၼ်းပၢင်ယုၵ်ႉယွင်ႈဢဝ်ၵုၼ်းမုၼ် ဝၼ်းဝိသႃႇၶသေ ပူႇၸေႃႇမူးၸႃးြၽႃးပဵၼ်ၸဝ်ႈယဝ်ႉ။ တေႃႈၸၢဝ်းပုတ်ႉ ၸိူဝ်းဢၼ်တီႈမီးမိူင်းဝၼ်းတူၵ်းၶဝ်ၵေႃႈ ဢွၼ်ၵၼ်ယုၵ်ႉယွင်ႈဢဝ်ၵုၼ်းမုၼ် ဝၼ်းဝိသႃႇၶ လိူၼ်ႁူၵ်းမူၼ်းၵၼ်ၵႂႃႇၵူူႈတီႈယဝ်ႉ။

      ၽိူဝ်ႇထိုင်မႃးပီ 1999 လိူၼ်တီႇသႅမ်ႇပိူဝ်ႇၼၼ်ႉ၊ ပၢင်ၵုမ်လူင် U.N လႆႈမၵ်းမၼ်ႈ ဝၼ်းဝိသႃႇၶ လိူၼ်ႁူၵ်းမူၼ်း ႁႂ်ႈပဵၼ်ဝၼ်ဢၼ်ယိုင်ႈယႂ်ႇလူင်ၼႂ်းလူၵ်ႈဝၼ်းၼိုင်ႈယဝ်ႉ။ ၶေႃႈတႅပ်းတတ်း U.N ၼႆႉ မၼ်းပဵၼ်ၵၢၼ်ၶိုပ်ႈၼႃႈ ပုၼ်ႈတႃႈပုတ်ႉထတေႉတေႉယဝ်ႉ။ ဝၢႆးသေၼၼ်ႉ တီႈ U.N ယင်းလႆႈၽိၵ်ႈမွၵ်ႇ ၽူႈဢွၼ်ႁူဝ်ၸၢဝ်းပုတ်ႉၵူႈမိူင်းမိူင်းသေ ယုၵ်ႉယွင်ႈဢဝ် ဝၼ်းဝိသႃႇၶ လိူၼ်ႁူၵ်းမူၼ်း တီႈၸိုင်ႈမိူင်း ဢမေႇရိၵၢၼ်ႇ ဝဵင်း ၼိဝ်ႊယွၵ်ႉ (New York, American) ယူႇယဝ်ႉ။

မိူဝ်ႈပီ 2004 ၼၼ်ႉ ၵိူင်းၽၢႆႇ မႁႃႇယၼလႄႈထေႇရဝႃႇတ လႆႈမႃးႁူပ်ႉထူပ်းၵၼ်တီႈမိူင်းထႆးသေ ဢုပ်ႇဢူဝ်းၵိူဝ်းၵုမ်ၵၼ်ဝႃႈ တေၸတ်းႁဵတ်းပႆွးဝၼ်း ယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်း ႁူမ်ႈၵၼ်ၼႆသေ တီႈၼႂ်းၵုၼ်ဢေးသျႃးၼႆယူႇ။ ၶဝ်ၸဝ်ႈလႆႈၽွမ်ႉသဵင်ပဵင်းပၢၵ်ႇ တူၵ်းလူင်းၸႂ်ၵၼ်ဝႃႈ တေယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်း တီႈမိူင်းထႆးၵူႈပီၼႆယဝ်ႉ။ ယွၼ်ႉၼၼ်လႄႈမိူဝ်ႈဝၼ်းဝိသႃႇၶ လိူၼ်ႁူၵ်းမူၼ်း ၼႂ်းပီ 2005 ၼႆႉ ၸၢဝ်းပုတ်ႉၸဵမ် မႁႃႇယၼလႄႈထေႇရဝႃႇတ ဢၼ်လုၵ်ႉတီႈသီႇသိပ်းမိူင်းၼၼ်ႉ ဢွၼ်ၵၼ်မႃး ယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်း တီႈမိူင်းၵွၵ်ႇ ၸိုင်ႈထႆး။ လူင်ပွင်ၸိုင်ႈထႆး ပဵၼ်ၽူႈၵမ်ႉထႅမ်လွင်ႈငိုၼ်းတွင်း။ တင်းမူတ်းလႆႈၸႂ်ႉၸၢႆႇၵႂႃႇပႅတ်ႇသိပ်းသီႇလၢၼ်ႉဝၢတ်ႇ ငိုၼ်းထႆး (သွင်လၢၼ်ႉတေႃႇလႃႇ) ၼႆယဝ်ႉ။

      တူဝ်ၽူႈတႅမ်ႈလိၵ်ႈၵေႃႈ လႆႈႁပ်ႉၼိမၼ်ႇတၼ မိူဝ်းၸႆွႈၵၢၼ်တီႈ မိူင်းၵွၵ်ႇ။ လႆႈမိူဝ်းၸႆွႈႁၢင်ႈႁႅၼ်းထႅမ်ၵၢၼ် ၵႃႈတီႈၸၼ်ႉၸွမ်သင်ႇၶ မႁႃႇၸူႇလႃး လူင်းၵွၼ်း (Mahachulalongkornrajavidyalaya University) မွၵ်ႈသွင်ဝူင်ႈ။ လႆႈၸွႆႈပိၼ်ႇၽႃႇသႃႇ၊ ၸႆွႈႁဵတ်းမၢႆၶပ်းပၢင်၊ ၸႆွႈထတ်းလိၵ်ႈ၊ ၸႆွႈတိတ်းတေႃႇၼွၵ်ႈမိူင်း။ မိူဝ်ႈဝၼ်းထိ 20.5.2005 တႄႉ လႆႈတၢင်တူဝ်သင်ႇၶသေ ဢွၵ်ႇၶၢဝ်ႇၼႂ်းထီးဝီး (TV 11) ၶွင်ႉသိပ်းဢဵတ်း ဢၼ်ပဵၼ်ၽၢႆႇဢင်းၵိတ်း။ မိူဝ်ႈဝၼ်းထိ 21.5.2005 သမ်ႉလႆႈႁေႃးြတႃးတီႈ သၼၢမ်လူင် ၼႃႈဝတ်ႉၽၵႅဝ်ႈ ဢွၵ်ႇၼႂ်းဢွမ်လူမ်း ပဵၼ်ၽႃႇသႃႇ ဢင်းၵိတ်းထႅင်ႈ။

      တင်ႈတႄႇဢဝ်ၼႆႉၵႂႃႇၽူႈတႅမ်ႈလိၵ်ႈလႆႈပဵၼ်ၵမ်ႇမၵၢၼ်(ၽူႈၶဝ်ႈၶွမ်ႇမတီႇ) တႃႇႁၢင်ႈႁႅၼ်းပၢင် ယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်း ၵူႈမိူင်းမိူင်း တီႈဝဵင်းမိူင်းၵွၵ်ႇဝႆႉလႄႈ တေလႆႈၶတ်းၸႂ် မိူဝ်းၸႆွႈၵၢၼ်ယူႇၵူႈပီ။ တီႈမိူင်းထႆး လႆႈႁုၸၵ်းၽူႈတႅမ်ႈလိၵ်ႈသေ လႆႈႁုၸၵ်းလွင်ႈသင်ႇၶတႆးႁဝ်းၸွမ်းၼၼ်ႉယဝ်ႉ။ တီႈၸၼ်ႉၸွမ် မႁႃႇၸူႇလႃး လူင်းၵွၼ်း ၵေႃႈ ႁုၸၵ်းလွင်ႈဝႃႈတႆးၼႆႉပဵၼ်ၸိူဝ်ႉၸၢတ်ႈႁင်းၶေႃၼႆသေ ၼပ်ႉယမ်ႁဝ်းမႃးၼမ်ယဝ်ႉ။ သင်ႇၶတႆး ဢၼ်တိုၵ်ႉႁဵၼ်းယူႇ မႁႃႇၸူႇလႃး လူင်းၵွၼ်း ၸိူဝ်းၼၼ်ႉၵေႃႈ ၽၢႆႇၸၼ်ႉၸွမ်ၶဝ်မၵ်းမၼ်ႈဝႃႈ ပဵၼ်လုၵ်ႈႁဵၼ်းသင်ႇၶတႆးၼႆယဝ်ႉ။ မိူဝ်ႈၵူႈပွၵ်ႈတႄႉ ပီႈၼွင်ႉထႆး တီႈမိူင်းၵွၵ်ႇၶဝ်ၵမ်ႈၼမ် ဢမ်ႇႁုၸၵ်းတႆး။ ၶဝ်ထၢင်ႇဝႃႈႁဝ်းပဵၼ်မၢၼ်ႈၼႆယဝ်ႉ။

      တီႈၼႂ်းပၢင် ယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်း ပီိ 2014 ၼႆႉ မီးၽူႈၼမ်း သင်ႇၶမိူင်းၶႄႇ၊ မိူင်းမူင်ႇၵူဝ်းလီးယိူဝ်း၊ မိူင်းၵမ်ႇပူးသျႃး(ၶမဵၼ်)၊ မိူင်းလၢဝ်း၊ မိူင်းသီႇႁူဝ်ႇ၊ မိူင်းထႆႇဝၼ် လႄႈ မိူင်းမၢၼ်ႈ မႃးၶိုၼ်ႈႁွတ်ႈၼမ်ဝႆႉ။ ၸဝ်ႈၶူးဝႃးလူင်ၸွမ် ဢၼ်ပဵၼ်ၽူႈၼမ်းသင်ႇၶတႆးလိုဝ်ႉ တီႈမိူင်းသိပ်းပၼ်ၼႃးၵေႃႈယေႃးၶိင်းမႃး။ ၼႂ်းမိူင်းမၢၼ်ႈတႄႉ မီးၵႅမ်ႁူဝ်ပဝ်ႈ သင်ႇၶၼႃႇယၵၸိုင်ႈမိူင်းၼမ်းၼႃႈသေမႃး။ ၸဝ်ႈြသႃႇသီႇတၵူႇ၊ ၸဝ်ႈသီႇလၵ်ႉၶၼ်ႇထ(ပိတၵတ်ႉသၢမ်ၵွင်) ၸဝ်ႈြသႃႇပၼ်ႇတိတႃႇၽိဝမ်ႇသ ဢၼ်ပဵၼ် ဢထိပတိ ၸၼ်ႉၸွမ်သင်ႇၶတႃႈၵုင်ႈ၊ တွၵ်ႇတိူဝ်ႇမျိႃဝ်းမိျၼ်ႉၽူႈၵုမ်းၵၢၼ် သႃႇသၼႃႇ(တႃႈၵုင်ႈ)၊ တွၵ်ႇတိူဝ်ႇၶိၼ်ႇမွင်ႇၺုၼ်ႉ ၸၼ်ႉၸွမ်ထေႇရဝႃႇတ(တႃႈၵုင်ႈ) လႄႈ တွၵ်ႇတိူဝ်ႇၸူဝ်းယိၼ်ႇ ဢၼ်ပဵၼ်ဢထိပတိၵႃႈတီႈၸၼ်ႉၸွမ်တႃႈၵုင်ႈ ၸိူဝ်းၼႆႉၵေႃႈမႃးၶိုၼ်ႈၸွမ်း။

ၵမ်ႈၽွင်ႈပႆႇဝႆႉၼၵ်းတႄႉတႄႉ

      ပိၵ်ႉသမ်ႉမိူင်းၸၢဝ်းပုတ်ႉၵူႈမိူင်းလႄႈၸုမ်းၸၢဝ်းပုတ်ႉၵူႈတီႈဝႆႉၼၵ်းၼႃ ဝၼ်းဝိသႃႇၶ လိူၼ်ႁူၵ်းမူၼ်းသေတ ၼႂ်းမိူင်းမၢၼ်ႈတႄႉ ပႆႇပေႃးဝႆႉၵႃႈၶၼ်ယႂ်ႇၵႃႈႁိုဝ်။ ယွၼ်ႉဝႃႈတီႈဢဝ်ၸႂ်ပၵ်း (focus) ပႆႇႁႅင်းပဵင်းပေႃးၼၼ်ႉယဝ်ႉ။ မိူဝ်ႈၸဝ်ႈြသႃႇလူင်ၶဝ်ၸဝ်ႈ တေမႃးတီႈမိူင်းၵွၵ်ႇပီၼႆႉၼၼ်ႉ မီးတၵႃႇၵူၼ်းလူင်ၵေႃႉၼိုင်ႈဝႃႈ “ပဵၼ်ပၢင်သွၼ်းၼမ်ႉမႆႉပေႃးထိဢွၼ်ႇၵူၺ်း ၸဝ်ႈၶဝ်ပေႉဝႆႉၵႃႈၶၼ်ယႂ်ႇႁဵတ်းသင်သေ ၵႂႃႇပဵၼ်တၢၼ်ႇၼၢႆႉ” ၼႆယဝ်ႉ။ တီႈၼႂ်းမိူင်းႁူမ်ႈတုမ်မိူင်းမၢၼ်ႈၼႆႉ တိုၵ်ႉဢဝ်ဢၼ်ႁူတ်းၼမ်ႉတူၼ်ႈပေႃးထိၼၼ်ႉ ပဵၼ်တီႈဢဝ်ၸႂ်ပၵ်းမၼ်းဝႆႉၵူၺ်း လႄႈ ဝၼ်းဝိသႃႇၶ လိူၼ်ႁူၵ်းမူၼ်းၼႆႉၽႂ်ပႆႇပေႃးႁၼ်ယႂ်ႇ။ လႆႈငိၼ်းဝႃႈတေႃႈ BBC ၽၢႆႇမၢၼ်ႈၶဝ်ၵေႃႈ ယင်းဢမ်ႇပွင်ႇၸႂ်ဝႃႈ ဝၼ်းဝိသႃႇၶ လိူၼ်ႁူၵ်းမူၼ်း ဢၼ် U.N လႄႈၶုၼ်မိူင်းထႆးၶဝ်ၼမ်းၼႃႈသေ ယုၵ်ႉယွင်ႈတီႈမိူင်းၵွၵ်ႇၼၼ်ႉ မၼ်းမီးၽွၼ်းလီတႃႇၸၢဝ်းပုတ်ႉတၢင်းလၢႆၵႃႈႁိုဝ်ၵွၼ်ႇ။

      တီႈတႄႉမၼ်း ြၽႃးပဵၼ်ၸဝ်ႈပဵၼ်ၸဝ်ႈ ပဵၼ်ၽူႈယိုင်ႈယႂ်ႇ မျၢတ်ႈတွၼ်းသေပိူၼ်ႈလႄႈ ဝၼ်းဝိသႃႇၶ လိူၼ်ႁူၵ်းမူၼ်းၼႆႉၵေႃႈ ပဵၼ်ဝၼ်းဢၼ်ယိုင်ႈယႂ်ႇလိူဝ်ပိူၼ်ႈ (the most important day) ပုၼ်ႈတႃႇၸၢဝ်းပုတ်ႉတင်းလၢႆယဝ်ႉ။ ယွၼ်ႉၼၼ်သင်ႇၶတႆးတင်းလၢႆ လီလႆႈမႄးပိၼ်ႇလႅၵ်ႈလၢႆႈ ၵၢၼ်ႁဵၼ်းႁဝ်း ၼင်ႇႁိုဝ်ၸၢဝ်းပုတ်ႉတႆးတင်းလၢႆ ပေႃးတေဝႆႉ ဝၼ်းဝိသႃႇၶ လိူၼ်ႁူၵ်းမူၼ်းၼႆႉ ၼၵ်းၼၵ်းၼႃၼႃယူႇယဝ်ႉ။

      ၼင်ႇႁိုဝ်ၸၢဝ်ပုတ်ႉတႆး တေႁုလွင်ႈ ဝၼ်းဝိသႃႇၶ လိူၼ်ႁူၵ်းမူၼ်းၼမ်ၼၼ်ႉ ၸဝ်ႈသင်ႇၶတႆးလူဝ်ႇလႆႈတုမ်ၵၼ်သေ ယုၵ်ႉယွင်ႈဝၼ်းထွတ်ႈမျၢတ်ႈလူင်ၼႆႉၸွမ်းၵၼ်၊ တေလႆႈသင်ႇသွၼ်ပၼ်တီႈတၵႃႇၶဝ်ဝႃႈ ဝၼ်းဝိသႃႇၶ လိူၼ်ႁူၵ်းမူၼ်းၼႆႉ ပဵၼ်လွၼ်ႉၵႅၼ်ၽၢင်ႁၢင်ႈၸၢဝ်းပုတ်ႉႁဝ်း။ တေလႆႈႁေႃးြတႃးလႄႈတႅမ်ႈလိၵ်ႈထမ်းဢွၵ်ႇ ႁႂ်ႈပဵၼ်တီႈယုၵ်ႉယွင်ႈ ဝၼ်းဝိသႃႇၶ လိူၼ်ႁူၵ်းမူၼ်းၵၼ်ယဝ်ႉ။ ပေႃးႁဵတ်းၼၼ်ၸိုင် ၸၢဝ်းၶိူဝ်းတႆးႁဝ်းၵေႃႈ တေၶဝ်ၸမ်ၸၢဝ်းပုတ်ႉ ၼမ်ၶိုၼ်ႈမႃး ၼႂ်းလူၵ်ႈတိၵ်းတိၵ်းယူႇဢမ်ႇႁၢင်ႉယဝ်ႉ။

ၽိုၼ်ဢိင်…ပပ်ႉၵဵပ်းႁူမ်ႈပုၵ်ႈၵႂၢမ်း (ၸဝ်ႈၶူးလူင် Prof.Dr. ၶမ်းမၢႆ ထမ်ႇမသႃမိ) {ထမ်ႇမႃႇၸရိယ MA,AM,MPil (BPU&Kelaniya) DPhil. Oxford}